Қазақстан құрамасы Әлем чемпионатына аттанды

ҚАЗАҚСТАННЫҢ ОТЫРЫП ОЙНАЙТЫН ВОЛЕЙБОЛДАН ҰЛТТЫҚ ҚҰРАМАСЫ ӘЛЕМ ЧЕМПИОНАТЫНА АТТАНАДЫ

Бүгін әлем чемпионатына аттанар алдында Қазақстан Волейбол федерациясының бірінші вице-президенті Арман Қабесовпен бірге отырып ойнайтын волейболдан Қазақстан ерлер ұлттық құрамасымен кездестік. 1–6 шілде аралығында Астанадағы Паралимпиадалық даярлық орталығында команда маусымның басты додасы қарсаңындағы қорытынды оқу-жаттығу жиынын өткізді. 6 шілдеде ұлттық құрама Қытайдың Ханчжоу қаласына аттанады. Онда 10–17 шілде аралығында отырып ойнайтын волейболдан әлем чемпионаты өтеді. Дүбірлі додаға әлемнің ең мықты 32 құрамасы қатысады: олардың 16-сы ерлер, 16-сы әйелдер командалары. Чемпионат жүлделерінен бөлек, спортшылар 2028 жылы Лос-Анджелесте өтетін Паралимпиада ойындарына берілетін екі жолдама үшін де бақ сынайды. Жеребе қорытындысы бойынша Қазақстан құрамасы С тобында сынға түседі. Бұл топтағы қарсыластары — Бразилия, Хорватия және Иран құрамалары. Айта кету керек, Қазақстанның отырып ойнайтын волейболдан ұлттық құрамасы Азиядағы үздік командалардың бірі саналады және көптеген жылдар бойы халықаралық жарыстарда еліміздің намысын абыроймен қорғап келеді. Федерацияның қолдауының, спортшыларымыздың жоғары шеберлігі, тәртібі және мықты командалық рухының арқасында ұлттық құрамамыз лайықты ойын көрсетіп, жоғары нәтижелер үшін табанды күрес жүргізетініне сенімдімін. Командаға әлем чемпионатында сәтті өнер көрсетіп, жарқын жеңістерге жетуіне және елге қуанышты жаңалықпен оралуына тілектеспін!

Бұл туралы Қазақстандық пара волейбол федерациясының президенті Дүйсенбай Тұрғанов өзінің Facebook парақшасында хабарлады.